JavaScript Funksiya

Funksiya — dasturlashning ustunlaridan biri. Funksiyani tushunmasdan turib jiddiy loyiha yozib bo’lmaydi. Ular kodni takrorlashdan qutqaradi, uni bo’laklarga ajratadi va o’qishni osonlashtiradi. JavaScript’da funksiya ayniqsa markaziy o’rin tutadi — hatto hodisalar (event) ham funksiyalar orqali boshqariladi.

Funksiya — ma’lum bir vazifani bajaradigan, nom bilan atalgan va qayta-qayta chaqirsa bo’ladigan kod bloki. U parametr qabul qilishi va natija qaytarishi mumkin.

Funksiya e’lon qilish va chaqirish

JavaScript’da funksiya function kalit so’zi bilan e’lon qilinadi:

function salomlash() {
    console.log("Assalomu alaykum, UzbekDevs!");
}

salomlash();
salomlash();

Assalomu alaykum, UzbekDevs!
Assalomu alaykum, UzbekDevs!

function salomlash() funksiyani e’lon qildi, biroq uni bajarmadi. Bajarilishi uchun uni nomi bilan chaqirish kerak: salomlash(). Bir marta yozilgan kodni ikki marta ishlatdik.

Parametr va natija

Funksiya tashqaridan qiymat (parametr) qabul qilib, return orqali natija qaytaradi:

function yigindi(a, b) {
    return a + b;
}

let natija = yigindi(15, 27);
console.log(natija);
console.log(yigindi(100, 200));

42
300

return qiymatni funksiyadan tashqariga chiqaradi. console.log ekranga chiqaradi, return esa qiymatni qaytaradi — bu ikkovining tub farqi.

Standart parametr

Parametrga oldindan qiymat berish mumkin. Agar chaqiruvda u berilmasa, standart qiymat ishlatiladi:

function salomlash(ism = "mehmon") {
    console.log("Salom, " + ism + "!");
}

salomlash();
salomlash("Farrux");

Salom, mehmon!
Salom, Farrux!

Arrow funksiya

Zamonaviy JavaScript qisqaroq funksiya yozish usulini beradi — arrow function (=>):

const kopaytma = (a, b) => a * b;

console.log(kopaytma(6, 7));

42

const kopaytma = (a, b) => a * b — an’anaviy funksiyaning ixcham shakli. Bir amalli funksiyalarda return va jingalak qavslarni tashlab, yanada qisqartirish mumkin. Arrow funksiyalar zamonaviy JavaScript kodida juda ko’p uchraydi.

Xulosa

Bu bo’limda funksiya e’lon qilish, chaqirish, parametr va return, standart parametr hamda zamonaviy arrow funksiyani ko’rib chiqdik. Funksiya — kodni qayta ishlatish va tartibga solishning eng kuchli quroli. Keyingi darsda hodisalar (event) — foydalanuvchi harakatiga javob berishga o’tamiz.